Sábado 23.02.2019

As empresas da Limia terán unha nova ferramenta de axuda a exportación

Esta iniciativa, enmarcada no programa ExportOU, foi presentada hoxe polo vicepresidente da Deputación de Ourense, o vicepresidente da CEO, e o profesor Jesús Albizu, especialista no deseño de programas relacionados coa internacionalización das empresas

Rosendo Fernández na presentación do Sistema de Feiras Virtuais
Rosendo Fernández na presentación do Sistema de Feiras Virtuais

A Deputación de Ourense e a Confederación Empresarial de Ourense (CEO) dan un paso máis no apoio á internacionalización das empresas ourensás cunha nova ferramenta, no marco do programa ExportOU, que consiste nun Sistema de Feiras Comerciais Virtuais co fin de ofrecer unha solución tecnolóxica abordable, para mellorar a súa presenza comercial internacional e a captación de clientes e distribuidores estranxeiros de maneira sinxela e accesible. A presentación desta nova proposta tecnolóxica tivo lugar hoxe na sede da CEO, acto no que participou o vicepresidente da Deputación de Ourense, Rosendo Fernández; o vicepresidente da CEO, Alejandro Cruz; e o profesor Jesús Albizu, asesor e especialista en deseño de programas relacionados coa internacionalización das empresas, especialmente para pemes, e que desenvolveu programas para impulsar programas de exportación en 21 países de Europa, América, Asia e África.

Rosendo Fernández lembrou que no pasado mes de marzo o presidente da Deputación de Ourense e o presidente da CEO asinaron un convenio de colaboración para desenvolver un plan de aceleración e reforzo intelixente para a internacionalización das empresas ourensás, no marco da iniciativa ExportOU, e “xa se informara de que a “Oficina Virtual” de apoio á internacionalización levará a cabo o mantemento e mellora da plataforma ExportOU, que contaría tamén cunha nova sección de “Feiras Virtuais”. “Con esta iniciativa fortalecemos o Programa ExportOU para beneficio das empresas de Ourense, nun mundo globalizado onde é difícil competir”, afirmou Rosendo Fernández.

O vicepresidente da CEO incidiu na “aposta decidida” da entidade pola internacionalización do empresariado da provincia, a través de programas de formación específica e a organización de misións comerciais inversas que posibilitaron o establecemento de negocios para moitas das empresas participantes con outras de Europa, África, Asia e América.

Jesús Albizu, Rosendo Fernández, Alejandro Cruz e Jaime PereiraO profesor Albizu explicou o funcionamento desta ferramenta e destacou que as “feiras virtuais” “funcionan como reforzo á presenza internacional, posibilitando que o encontro entre empresas interesadas en vender e os potenciais clientes se produza a baixo custe nunha plataforma accesible en Internet”.

O Sistema de Feiras Virtuais, que o profesor Albizu cualificou como “tren do futuro”, revoluciona o ámbito da exportación comercial. Explicou que o feito de que o encontro se poida producir dunha maneira virtual “permite multiplicar os esforzos comerciais sen o custe engadido das viaxes aos países de destino nos que se quere presentar o produto e captar empresas interesadas”. Aínda así, matizou que se trata “dun complemento, non dunha substitución, é dicir, non se pretende prescindir de feiras ou misións, senón de apoialas e multiplicalas mediante accións máis económicas, máis numerosas e máis fáciles de organizar”.

Funcionamento do sistema

O Sistema de Feiras Virtuais consiste en invitar a potenciais clientes, axentes ou distribuidores a que visiten unha “feira virtual” na que estean presentes as empresas interesadas, cada unha delas con seu stand personalizado, no que presenta a empresa e a súa oferta de produtos a través dun vídeo. Deste modo, os visitantes virtuais poden percorrer a feira e establecer comunicación, interacción e contacto con cada unha das empresas presentes.

A través desta ferramenta as pemes ourensás poden “avanzar e crecer, ser visibles, e comunicarse cos potenciais clientes”, sinalou Jesús Albizu, quen salientou que a novidade deste servizo é que toda esa información “axudará en misións inversas e directas e nas presentacións sectoriais”. “Trátase de ofrecer medios que, a baixo custe, lles permita ás pequenas empresas ourensás estar onde están os seus potenciais clientes”, engadiu o profesor.