Domingo 20.01.2019

O PSDEG-PSOE DE XINZO DE LIMIA RECLAMA Ó GOBERNO MUNICIPAL DO PP A REVISIÓN DO IBI DAS ZONAS URBANIZABLES DO MUNICIPIO

Os socialistas manifestan que “no concello hai polo menos tres áreas cualificadas como urbanizables nas que os propietarios están pagando por un IBI de terras urbanas cando en realidade non é así

O grupo socialista de Xinzo de Limia reclamará ó goberno local do PP durante o pleno municipal, que se realice unha revisión do IBI das zonas urbanizables do municipio, dado que o Tribunal Supremo determinou, no ano 2014, que os propietarios de terreos en zonas urbanizables sen planificación de desenvolvemento, teñen que pagar o IBI rústico que é moito máis económico. Ademais, como consecuencia da non aplicación desta rebaixa do IBI, o concello podería estar obrigado a devolver os cobros indebidos efectuados ós propietarios afectados.

Os socialistas reclaman que o Concello solicite á Xerencia Territorial do Catastro, a revisión e aplicación do IBI correspondente ó solo urbanizable sen planificación de desenvolvemento, aprobado en virtude da normativa vixente. Tamén que o concello remita ó Catastro, a lista de propiedades afectadas por ser clasificadas no PXOM como urbanizables e que carecen dun plan de urbanización detallado aprobado. Por último, demandan que os procedementos se realicen sen demora, para que os novos valores entren en vigor o máis axiña posible, coa posibilidade de efectos retroactivos por cargos indebidos.

A portavoz socialista, Elvira Lama, sinala que “no municipio hai, polo menos, tres áreas no PXOM clasificadas como urbanizables, e os propietarios deste tipo de solo están Elvira Lamapagando por un IBI urbano cando en realidade non é tal, segundo a lexislación vixente”. Lama recorda que “despois do estoupido da crise económica e coa paralización do sector da construción, tardarán moitos anos en poder desenvolverse proxectos para estes terreos”. Tamén explica que “de non aplicarse a necesaria revisión, os cobros poderían converterse nun problema para o Concello, dado que os propietarios, lexitimamente, poderían solicitar a devolución das taxas con efectos retroactivos, o que implicaría problemas económicos para o obrigado equilibrio das contas municipais”. “Xa non é a primeira vez que os afectados noutros concellos da provincia, con toda razón, solicitan unha solución para o problema”, destaca a portavoz. “Estamos ante un problema que esixe dunha solución pronta e axeitada, pois estamos a falar de cobros indebidos que afectan directamente ó peto dos nosos veciños e veciñas”, conclúe.

O Tribunal Supremo desestimou en 2014 o recurso de casación en interese de lei suscitado pola administración, entendendo que non se pode clasificar como solo urbano aquelas terras que, aínda sendo urbanizables e estando sectorizadas, non teñan un instrumento concreto de planificación aprobado. Esta resolución xudicial afecta só a aqueles terreos cualificados polo PXOM como urbanizables, pero que por estar incluídos en sectores urbanísticos, o Catastro consideraba urbanos, co conseguinte aumento da súa valoración económica. Isto débese ó feito de que, aínda que a urbanización destes terreos estivese prevista a medio ou longo prazo, non hai un instrumento de planificación aprobado para a execución material da urbanización.

Posteriormente a esta sentenza, o Goberno central modificou a lei do catastro e a lei hipotecaria, co fin de adaptala á legalidade vixente estipulada polo máis alto tribunal do Estado.

O PSDEG-PSOE DE XINZO DE LIMIA RECLAMA Ó GOBERNO MUNICIPAL DO PP A REVISIÓN DO IBI DAS...