A Europa limiá é azul
Os populares venceron en trece concellos dos dezaseis que baña o río do Esquecemento
REDACCIÓN
Twitter: @Dendealimia
Soamente tres concellos, dos dezaseis que conforman as comarcas da Limia e Baixa Limia, se resistiron ao voto azul: Vilar de Santos, Calvos de Randín e Entrimo. Os trece restantes, concedéronlle a maioría nestas eleccións do Parlamento Europeo ao Partido Popular. O PSOE foi o máis votado en Calvos de Randín e Entrimo e a forza galeguista Compromiso por Galicia dominou as urnas en Vilar de Santos.
O presidente do PP provincial, Manuel Baltar quixo agradecer tras coñecer os resultados positivos para o seu partido o apoio que nos enche de forza para encarar a partir de xa as municipais do 2015. Así mesmo, Baltar quixo salientar que a provincia de Ourense foi a mellor de Galicia en apoio ao seu partido e a segunda mellor de España. Un resultado que asegurou, veu apoiado polos altos índices de participación preto dun 48%, que outorga maior lexitimidade democrática á vitoria popular.
Fin de campaña en Xinzo
O pasado venres, o partido vencedor destas eleccións ao Parlamento Europeo escolleu a capital da Limia para poñer punto e final á súa campaña electoral na provincia, facíao cun mitin no que interviñan Antonio Pérez, líder do PP limiao, Manuel Baltar e Agustín Hernández, o vicesecretario xeral do PPdeG. Durante a súa intervención na Casa da Cultura de Xinzo, Baltar asegurou que Xinzo sabe da importancia de Europa e vaticinaba que o domingo seguirá apostando por Europa.