A superficie afectada polo incendio de Cualedro será declarada zona de actuación especial
Así o decidiu o Goberno a través dunha carta enviada á Xunta
Os termos municipais de Cualedro, Trasmiras, Baltar e Xinzo de Limia, serán declarados zona de actuación especial. Así o comunicou o Ministerio de Agricultura, Alimentación e Medio Ambiente, co fin de proceder á restauración forestal e medioambiental das superficies afectadas polo lume.
Dita información recóllese nunha carta que a ministra de Agricultura, Alimentación e Medio Ambiente, Isabel García Tejerina, fixo chegar á conselleira do Medio Rural e do Mar, Rosa Quintana.
Urxe acometer estas obras en materias específicas para minimizar os danos pola erosión, como consecuencia do incendio, e que se recuperen na maior brevidade posible os hábitats prexudicados.
O Goberno prevé unha inversión de máis de 500.000 euros para levar a cabo estas actuacións.
O lume ,que se produciu o pasado 30 de agosto,afectou a máis de 3.000 hectáreas, das cales, 748 eran arboradas de gran valor medioambiental e de protección do solo.