OS SOCIALISTAS LOGRAN QUE A ASOCIACIÓN DA PANTALLA POIDA MANTER O SEU ESPAZO NO MUSEO GALEGO DO ENTROIDO DE XINZO DE LIMIA LOGO DA CESIÓN Á DEPUTACIÓN DE OURENSE
Unha emenda de Elvira Lama permitiu que a redacción definitiva que vimos de coñecer recolla textualmente que o convenio “queda condicionado á reserva de uso a favor da Asociación A Pantalla”
NOTA DE PRENSA GRUPO SOCIALISTAS DE XINZO
A Asociación A Pantalla poderá seguir a empregar un local situado na planta baixa do edificio do Museo Galego do Entroido (MUGAE) de Xinzo de Limia, grazas ó traballo e ás xestións realizadas polo PSdeG-PSOE, trala aprobación da cesión deste espazo á Deputación de Ourense. E que o convenio co Concello de Xinzo para a súa transferencia en réxime de servizo público supramunicipal de competencia provincial non incluía unha regulación específica para esta particularidade –esta asociación empresa ese lugar desde o ano 2003 para preparativos dos diferentes días do ciclo do Entroido– ata que a deputada e concelleira, Elvira Lama, presentou unha emenda in voce que foi aprobada polo pleno.
Esa emenda permitiu que a redacción definitiva que vimos de coñecer estes días, recolla textualmente que o convenio “queda condicionado á reserva de uso a favor da Asociación A Pantalla do espazo da planta baixa do inmoble que ata agora viña utilizando a asociación, para o que se habilitará un acceso independente desde o exterior”. 
Lama destaca que, con iniciativas como estas, os socialistas “demostran que están preocupados por defender os intereses das persoas que, desde hai 25 anos, traballan realmente polo impulso dss tradicións e ó museo máis importante de Xinzo” e non como o PP que “só traballa arreo para enchufar os seus amigos”. “É vergoñento que o concelleiro de Cultura, Carlos Gómez, non fixese absolutamente nada por solventar este problema”, salienta. “A súa incapacidade para manter aberto o museo e o seu desleixo coas asociacións locais, son outra evidente proba da súa indigna estratexia para derribar a vida cultural de Xinzo”, denuncia.
Lama recorda que debido a incompetencia do PP, o MUGAE permanece pechado practicamente todo o ano desde 2015. “A pesar diso foi atendido por persoal voluntario da Asociación A Pantalla, que mostrou e explicou desinteresadamente ós visitantes a historia e as pezas do museo”, asegura. A deputada e concelleira tamén destaca o importante papel asumido por esta asociación para a difusión das particularidades e tradicións do Entroido de Xinzo de xeración en xeración, unha labor que vergoñentamente o PP esqueceu recoñecer. “A asociación foi ninguneada a pesar de que incluso se ofreceron a xestionar o MUGAE, foron desprezados á hora de redactar o convenio e, para colmo, case os botan pola calada”, denuncia.
Así mesmo e tamén a iniciativa da deputada e concelleira socialista, un representante da asociación designado pola súa directiva, formará parte do Consello Asesor do MUGAE, como órgano de informe e seguimento da xestión do museo, outra das medidas contempladas no convenio de cesión. O convenio inclúe a transferencia do servizo público municipal do museo e a cesión de uso indefinido do inmoble. “O máis importante é o recoñecemento a labor da asociación, que foi e seguirá sendo a alma mater do Museo Galego do Entroido e de toda as persoas que traballan arreo para que este patrimonio cultural non se perda. Agora o que resta é situar o MUGAE como referente e como centro de divulgación de todos os entroidos de Galicia” conclúe Lama.