O albergue de peregrinos de Xinzo abre as súas portas dous anos despois da súa inauguración
Tras dous anos dende a súa organización, os peregrinos xa non terán que ser desviados a Sandiás ou Vila de Rei.
Tras case dous anos dende a súa inauguración, o Albergue de Peregrinos de Xinzo de Limia abrirá por fin as súas portas. Fóra inaugurado o mesmo día que o Museo Galego do Entroido polo presidente da Xunta de Galicia, Alberte Núñez Feijóo. Mais isto en ningún momento implicara, ao longo destes últimos dous anos, a súa posta en funcionamento.
A directora xeral de Turismo da Xunta de Galicia, Nava Castro, vénlle de comunicar ao alcalde que o albergue será posto en funcionamento mañá.
Malia que a espera foi longa, a directora xeral de Turismo da Xunta de Galicia, Nava Castro, vénlle de comunicar ao alcalde da capital da Limia, Antonio Pérez, que o albergue será posto en funcionamento mañá mércores, día 23 de agosto. A Xunta comprometérase co consistorio no seu momento a que, tan pronto como as obras estivesen rematadas, a administración local lle cedería as instalacións á Xunta e xa o organismo autonómico se encargaría de poñelas en marcha. Mais non foi así ata hoxe. E a razón reside no feito de que a empresa que se adicaba a xestionar a maioría dos albergues de peregrinos dependentes da Xunta, deixou defacelo trala rescisión do contrato por parte de San Caetano. Así e todo, dende Compostela non se deron moita présa en resolver a nova convocatoria pública aberta para a contratación dunha nova empresa de servizos para xestionar as instalacións. De feito, esta convocatoria xa fora aberta hai exactamente un ano.
Os peregrinos xa non terán que ser desviados aos complexos de Sandiás e de Vila de Rei.
Pero xa todo rematou. Os peregrinos xa non terán que ser desviados aos complexos de Sandiás e de Vila de Rei (Trasmiras). A variante do Camiño de Santiago que atravesa Xinzo, a Vía Nova, non é a máis demandada a Asociación de Amigos do Camiño de Allariz xa levaban tempo reclamando tamén que houbera un albergue en Xinzo para potenciar esta variante da Vía da Prata.
O albergue consta de 15 prazas, cunha habitación para persoas con mobilidade reducida e precisaría dun mínimo de 2 persoas para atender correctamente a instalación e prestar ou servizo. Agora toca promocionar a vila para atraer peregrinos.