Elvira Lama sobre a imputación de Pérez: era de esperar
A voceira do PSOE en Xinzo asegurou que pedirán a dimisión do alcalde unha vez máis no próximo pleno
MARÍA FERNÁNDEZ ROMERO
Era de esperar foi a primeira reacción da rival política de Antonio Pérez e representante do grupo socialista en Xinzo, Elvira Lama ao falarlle da súa imputación. Non é nada raro, explicaba, desde a oposición e incluso o propio alcalde, estabamos esperando a que se producise, xa que as acusacións que se facían desde o xulgado do contencioso xa apuntaban que os indicios eran de prevaricación.
A voceira socialista recordounos o episodio vivido no pasado pleno de carácter extraordinario cando lle pediron ao rexedor a súa dimisión ante a situación xudicial do Concello, con nove sentenzas condenatorias por contratos ilegais. Daquela alegou que non marchaba porque nin sequera estaba imputado, e agora que o está, nós volveremos a pedir que marche, aseguraba Lama. Unha petición que farán efectiva no plenario de finais deste mesmo mes.
O que está pasando é gravísimo, polo que a dimisión sería un paso que o honraría, declaraba rotunda Elvira Lama a este dixital. É un home novo, debe dar exemplo, deixar o cargo e defenderse, para que despois sexa a xustiza quen determine se é ou non inocente, este proceder sería para o socialismo limiao o que debería seguir o alcalde da vila.
Non esperan a súa dimisión
Porén, a voceira dun dos principais partidos da oposición vaticinou que Antonio Pérez seguirá o exemplo doutros alcaldes da provincia que comparten con el a condición de deputados provinciais, e desde hoxe tamén a de imputados, e que permanecerá no seu cargo. Para Lama, Pérez quedará, seguramente alegando que a condición de imputado non é incompatible coa de inocente.