A Plataforma Xudicial de Xinzo cifra en 190.000 euros as perdas que poderían sufrir a hostalería e o comercio local se se suprimise o partido
O lanzamento da campaña informativa deste colectivo iniciarase tralas eleccións europeas
REDACCIÓN
Twitter: @Dendealimia
A Plataforma Xudicial de Xinzo de Limia lanzará a súa campaña para informar á cidadanía das consecuencias da supresión do Partido Xudicial tralas eleccións europeas do vindeiro 25 de maio. Entre estas consecuencias, este colectivo cita a perda, na vila de Xinzo de Limia, de máis de 6000 persoas cada ano, que terían que desprazarse a Ourense e con elas 190.000 euros menos de caixa para a hostalaría e o comercio. Ademais, segundo estes defensores da descentralización da xustiza, tamén se aumentará o gasto para os cidadáns da comarca, arredor de 380.000 euros, en concepto de desprazamentos á capital da provincia para trámites civís e xudiciais.
Campaña informativa
Os actos da campaña informativa comezarán o vindeiro 27 de maio na feira comarcal. Os membros da Plataforma de Xinzo de Limia, colocarán unha mesa informativa na Praza do espolón e percorreran a vila de Xinzo de Limia, colocando mais de 1000 carteis informativos e distribuíndo mais de 3000 panfletos entre a cidadanía.
Tamén distribuirán entre a hostalería e o comercio local, follas para a recollida de sinaturas, solicitando o mantemento do Partido xudicial de Xinzo de Limia. Procederase tamén á colocación de pancartas en defensa do Partido Xudicial de Xinzo de Limia, en todos os Concellos da Comarca da Limia e na vila de Xinzo de Limia, así coma no propio edificio do xulgado. O mércores 28 dedicarase á avaliación das actuacións levadas a cabo o martes polo que a Plataforma volverá a reunirse na Casa da Cultura.