“O entroido de Xinzo de Limia” de Edelmiro Martínez Cerredelo "Miro".

Aínda que o libro xa viu a luz fai unhas semanas, a Casa da Cultura será o escenario no que se levará a cabo o acto literario que contará coa intervención do autor, Edelmiro Martínez Cerredelo, e con Federico Cocho e Antón Riveiro Coello como convidados especiais.

Trátase dun ato cultural moi agardado polos veciños de Xinzo de Limia. Esta fin de semana o Concello, a través da concellería de Cultura, retoma a programación dunha presentación literaria que tivo que pospoñerse o pasado mes de setembro e que conta cun significado especial. En concreto, darase a coñecer a obra que leva por título “O entroido de Xinzo de Limia”. Será o venres día 19 de novembro a partir das 20.00 horas e terá a Casa de Cultura como escenario.

Está previsto que a alcaldesa, Elvira Lama, presente o libro e que interveñan o edil de Cultura, Ramiro Rodríguez; o presidente da Asociación A Pantalla, Carlos Valle Rivera; o escritor Antón Rivero Coello; o tamén escritor e xornalista Federico Cocho de Juan e o autor, Edelmiro Martínez Cerredelo.