Alguén non cre ao alcalde?
LUIS VELOSO
A estas alturas da película as cousas están pouco claras en todo o que se refire ó concello de Xinzo e sobre todo o seu e noso alcalde Antonio Chavelleiro.
Vou tratar de facer un percorrido no tempo, para despois chegar a unha conclusión final , que dende logo a estas alturas parece que aínda ten un longo camiño por diante.
O que ninguén pon en dúbida son as capacidades do alcalde. Antes de ser elixido dicíanse moitas cousas deste persoeiro político, tampouco ninguén dubidaba das súas dotes de liderado e de xestión.Tanto os contrarios como moitos dos seus , apuntaban como algo positivo ter conseguido sacar da alcaldía o sempiterno Vila.
Despois desta análise fágome as seguintes preguntas.
Volveuse tolo en só dous anos?
Esta pregunta loxicamente ten unha resposta, para nada
Entón que lle pode suceder a unha persoa, con capacidades e competencias suficientes para grandes xestións, véxanse as súas empresas, pode meterse no fregado no que parece estar neste momento, teña ou non teña razón, que iso será o xulgado quen o diga?
Pode alguén querer pasar polo xulgado por contratar a unha persoa para facer as labores de limpeza das rúas?
Pode esa mesma persoa pasar por prevaricador segundo algún maxistrado por contratar a un administrativo para funcións en cultura, e saír un día tras outro nos xornais? Botando por terra todo o traballo e xestión destes anos.
Non entro a valorar neste caso ningunha das cousas que están a saír nestes días, nos xornais incluídas as sentenzas, todas elas contrarias ós intereses do Concello, non do alcalde, por contratar a persoas cando podería non facelo, ou facelo con outras que lle estarían igual de agradecidas e desta maneira non ter problemas coa xustiza.
Sinceramente eu non creo que alguén nas súas plenas facultades e tendo unha recua de profesionais para asesoramento e compañeiros de partido, que algo terán que dicir tamén si as cousas saen mal, se arrisque tanto.
Por todo isto, penso que hai que buscar a explicación noutro lado , crer en que todo o que el di e a verdade ou que hai unha man negra que move os fíos para sacalo de alcalde.