Festival das Artes Escénicas de Riós
Esta fin de semana vai ter lugar un interesante acontecemento audiovisual, non na nosa comarca, pero no veciño Verín (en Riós, concretamente): o Festival das Artes Escéncias Abelardo Gabriel, dirixido polo actor e produtor Rubén Riós.
Xa é a sexta edición deste pequeno festival, que ano a ano se vai facendo máis grande grazas ao apoio e colaboración de artistas, creativos e sobre todo, ao seu promotor: Rubén Riós, que tenta, con este festival, manter activa a cultura na nosa zona e dinamizar un pouco o panorama audiovisual e veraniego da Galicia máis rural, o interior ourensán.
Este evento combina proxeccións audiovisuais con concertos musicais, actividades variadas e ata un partido de fútbol benéfico, polo que está dirixido a toda a familia. O ano pasado o festival contou coas actuacións de Cristina Pato, Toñito de Poi, Luis Tosar ou Luis Iglesia. Nesta vindeira edición o primeiro día do festival estára máis centrado no audiovisual para deixar o sábado máis espazo para os eventos lúdicos e festivos. Para comezar, a primeira xornada contará con tres estrea: a do documental A viaxe do Afiador do ourensán Aitor Rei, a preestrea da nova webserie galega Clases de lo Social de Pablo Cacheda, e o documental Caravana Vilamor: historia dunha promoción dunha servidora, en representación da comarca da Limia.
Tamén se presentará o filme Las Brujas de E´lente do tamén ourensán Simón Vázquez, que comezará a súa rodaxe na provincia a vindeira semana. Do mesmo xeito presentarase o proxecto A historia dun satélite, Rafael e a nai que o pariu das irmáns Also sisters e tamén se proxectarán as curtametraxes gañadoras do Festival de Cans deste ano.
Por outra banda no panorama musical desta primeira xornada contaremos coas actuacións de Daniel Minimalia, Yomelo Montosolo e unha sesión DJ para rematar.
A segunda xornada do festival preséntasenos máis lúdica e festiva, comezando con actividades para os máis cativos, a presentación da Ruta do Talento e un partido de fútbol benéfico. Proseguirá coa gala do festival e diversas actuacións musicais de Robert Ramírez, Malvela, Tony Lomba ea coral de Riós e un monólogo Pepo Suevos. A gala do festival estará presentada por Sonia López e entregaráselle a castaña de cristal a Rosa Cedrón.
Como vedes, vai ser unha fin de semana movidiña por Riós e hai actividades para todos os gustos, así que os que estedes na Limia e non teñades plan para este fin de semana non tedes excusa!