domingo. 02.10.2022

Trocalibros

Visión do interior da basílica (Foto fundación)
Visión do interior da basílica (Foto fundación)

Estou nun hotel en Barcelona cando escribo isto. Cansado dabondo despois dunha longa camiñada pola cidade, nunha xornada na que ocupei toda a tarde na visita do templo da Sagrada Familia, obra do maxistral arquitecto Antonio Gaudí. A palabra que mellor define a experiencia vivida é abraiado, non se me ocorre outra máis acaída diante do resultado da imaxinación portentosa dese home.

Sentado ó fresco na terraza do meu cuarto, a noite non está para contemplar a chuvia das Perseidas. A contaminación lumínica do ceo non permite aquí tal cousa.  Nada parecido aos ceos do verán da miña vila cando eu era neno, dos que aínda lembro a súa negrura, sobre a que o meu tío o Toniño Moca foi quen de me aprenderes a procurar a constelación do carro e a estrela Polar. Son estas horas as que aproveito para poñerme ó día das novas da miña vila, tanto en La región como neste xornal no que escribo os meus artigos. E é precisamente neste último onde leo a nova dunha iniciativa do Concello, representado pola alcaldesa Elvira Lama e o concelleiro Rafa Penabad, que leva por nome Trocalibros. Unha marabillosa actividade que convida a ler, tanto a maiores como a pequerrechos, trocando un libro que se leve por outro, en distintos lugares da vila. A min, estas cousas e ideas que fomenten a lectura parécenme sempre estupendas.

Prometinlles, no meu artigo anterior, contar o suceso dun roubo no comercio de Alonso Nieto na praza Maior. Será outro día. Malia estar en Barcelona, o croar das ras que hai nun estanque a carón do hotel lévame inexorablemente á miña terra. Así pois, nesta hora da noite vou pasar un tempo aquí sentado escoitándoas.  

Rafael Laso Lorenzo