VILAR DE SANTOS IMPULSA UN PLAN DE COMPETITIVIDADE DO SOLO INDUSTRIAL

A dinamización económica ten sido un obxectivo prioritario para o Concello de Vilar de Santos, optando polo aproveitamento e posta en valor dos recursos e capacidades locais para dotarnos de infraestruturas e servizos públicos de calidade con proxectos e investimentos realizados nos últimos anos no ámbito do desenvolvemento económico, os servizos sociais e benestar, a cultura e o patrimonio e os equipamentos públicos.

Partindo da nosa base agraria, o Concello apostou por novas áreas de desenvolvemento coa posta en marcha do Parque Empresarial de Santa Marta, xa no ano 1998. Ocupa na actualidade 225.000 m² de superficie con 23 empresas instaladas que dan emprego directo a máis de 110 persoas, ás que hai que sumarlle o emprego inducido.

Nunha coxuntura como a actual, as administracións públicas temos un importante papel na busca de novas alternativas, fomentando a actividade económica no entorno local.

Impulsamos e poñemos en marcha un Plan de Competitividade do solo Industrial do concello. Pretendemos activar a venda do solo industrial do Parque Empresarial e desta forma dinamizar a actividade económica e o emprendemento, co obxectivo tanto de reforzar o tecido empresarial do concello, modernizando e mellorando a súa competitividade, como de impulsar e fixar novas empresas con capacidade para xerar novos postos de traballo e consolidar as bases para que as diferentes iniciativas teñan e vexan en Vilar de Santos un espazo atractivo para investir e asentarse.

Neste momento, restan no Parque Empresarial 33.000 m² de solo industrial de propiedade municipal cunha ubicación estratéxica e gran nivel de servizos (sistema de Saneamento-Abastecemento Integral, enerxía - iluminación, sistema de telecomunicacións de alta capacidade, zonas verdes…), de dispoñibilidade plena e apto para a implantación de novas empresas e iniciativas.

Entre as principais medidas aprobadas que recolle o Plan nunha primeira fase, destacan:

• Acceso inmediato ao solo industrial dispoñible. En concreto, está prevista a venta de máis solo, cunha rebaixa do 10% no prezo establecido respecto da ultima venta pública, quedando fixado o prezo final en 18 euros/ m². Un prezo moi competitivo, social e responsable.
• Outra medida importante vai ser o Arrendamento con opción de compra de parcelas. O concello concede aos arrendatarios, un dereito de opción de compra da parcela polo prezo de venda sinalado. A renda queda fixada no 6% anual do prezo de venda de cada parcela.
• Outro paso máis, estableceuse unha liña de incentivos coa modificación da Ordenanza fiscal reguladora do imposto sobre construcións, instalacións e obras – o ICIO, fixando unha bonificación do 80% da cota do imposto a favor daqueles proxectos que sexan declarados de especial interese municipal por fomentar e crear emprego en Vilar de Santos.
• Posta a disposición e segregación de parcelas de diferentes tamaños.
• Seguridade xurídica, competencia técnica e axilidade nos trámites de licenza.
• Priorizar a instalación de proxectos, servizos e empresas do sector agrario e agroalimentario, estratéxico no concello e na Limia.
• A Axencia de Desenvolvemento Local do Concello multiplicará o seu labor tanto no apoio ás empresas asentadas no concello, como á creación de novas, a formación, a xestión de axudas e subvencións de interese e no asesoramento, información e asistencia para os emprendedores en novos proxectos e iniciativas.
• Estableceranse novas accións de dinamización e estudio de alternativas relacionadas coa promoción das empresas e dos diferentes sectores de actividade, ao mesmo tempo que tamén se analizan outras medidas e incentivos así como novas posibilidades de inversión no concello.

Paralelamente a este paquete de medidas que configuran o Plan, hai un conxunto de proxectos executados e outros previstos nas infraestruturas e dotación de servizos públicos que xa están incidindo positivamente na mellora e nas posibilidades do concello. \“Coa capacidade e garantía do concello acometeremos os investimentos necesarios con recursos propios e atendendo todos os compromisos para seguir avanzando no benestar social e na mellora da calidade de vida para todos os veciños e veciñas de Vilar de Santos. Actuacións que demostran a aposta do grupo de goberno do Concello por seguir impulsando un modelo de desenvolvemento propio, que fomenta e apoia a economía produtiva, o aproveitamento e posta en valor e diversificación dos nosos recursos e produtos e un paso mais no noso obxectivo de que Vilar de Santos siga a ter unha transformación positiva e un desenvolvemento económico e social equilibrado\”, di o alcalde, Xan Jardón