Apenas 3 días para o Domingo Oleiro
Será este domingo, 12 de febreiro.
A festa máis importante da capital da Limia non fixo máis que comezar o pasado domingo co Fareleiro. Xa só quedan 3 días para o Domingo Oleiro e, como o ano pasado, xa están as olas tradicionais preparadas.
A xornada comezará en Xinzo ás 12.30 horas co desfile do carro das olas polo Casco Vello da vila amenizado por grupos tradicionais que actuarán tamén ao longo de todo o día. Ás 13.00 horas será o turno dos máis pequechos co Oleiro infantil na Praza Maior.
Xa pola tarde, ás 16.30 horas, desfilará o carro das olas. Media hora máis tarde, ás 17 horas, dará comezo o Oleiro sénior polas rúas e prazas do centro de Xinzo de Limia.
Dende a organización do Entroido agradécese que os participantes do Oleiro vistan con corozas ou traxes vellos e apeiros de labranza dos anos 20 e 30.