Uns 2000 participantes encheron as rúas de Xinzo de cor co desfile infantil
Ás 11 da mañá saíron as primeiras comparsas para dar comezo ó venres de Entroido
Os nenos e nenas de 15 centros educativos da comarca participaron no desfile infantil de maior dimensión dos últimos tempos. O bo tempo acompañou esta xornada dedicada ós máis pequenos.
As rúas estaban ateigadas de familiares e veciños e veciñas que non quixeron perderse o pasarrúas máis animado e colorido destes días de Entroido.
Saíron ás 11 da mañá e logo de percorrer as vías principais da vila os ánimos non decaeron grazas á música.
Os máis pequenos non quixeron perderse o evento aínda que algún que outro aproveitou para pechar os ollos e relaxarse ó son da troula.
O desfile estivo marcado pola mestura de disfraces. 
Por primeira vez tamén participaron os alumnos e alumnas do IES Lagoa de Antela e IES Cidade de Antioquía.
A festa seguirá pola tarde a partir das 18h coas actuacións de Troula Animación e Uxía Lambona e a Banda Molona na Praza Maior.