9 ondascandidata a mellor película nos Mestre Mateo
Xinzo e outros puntos das comarcas do Limia foron escenario do filme de Simone Saibene
REDACCIÓN
redac@dendealimia.com
Twitter: @Dendealimia
A primeira largometraxe do italo-galego Simone Saibene foi nominada onte aos premios dos¡ audiovisual galego Mestre Mateo, como mellor película. Luis Tosar e Sabela Arán eran os encargados de dar a coñecer a lista de candidatos, entre os que tamén están El árbol magnético, Somos gente honrada e Inevitable.
O argumento deste filme comeza nalgún punto da fronteira entre Galicia e Portugal. O protagonista é unha sorte de Odiseo contemporáneo que, en lugar de atravesar a aventura máis épica da Historia, enfróntase a unha forma de épica do cotián, a unha viaxe na busca da súa propia memoria e identidade. A película, producida coa fórmula do crowdfunding e gravada enteiramente nas provincias de Ourense e Pontevedra, entre outros con escenarios nas comarcas da Limia e a Baixa Limia, está actualmente en fase de distribución.
O director e autor do guión, Simone Saibene asegurou ao saber da nominación, que está moi contento de que se producise, pois é unha película feita con moito cariño e traballo e cun orzamento que non supera os 27.000 euros. Ademais, recordou que Galicia é a súa terra de elección polo que participar nos Mestre Mateo, é algo que me enche de ilusión.