O alcalde de Xinzo empregou 1.700 euros nunha axencia de detectives para investigar ao arquitecto municipal
O PSOE considera gravísimo o acoso e derribo sufrido por este funcionario, do que aseguran Pérez intentaba librarse para contratar a dedo a outro
REDACCIÓN
O arquitecto municipal declarou ante o xuíz ter sido perseguido por unha axencia de detectives nunha investigación ordenada polo alcalde de Xinzo de Limia, Antonio Pérez. O orzamento empregado polo rexedor para este fin tería sido de 1.700 euros. Para o grupo municipal do PSOE esta actitude de acoso e derribo ao funcionario é unha situación gravísima. E acusan a Antonio Pérez de intentar desaloxar do seu posto ao arquitecto municipal, para contratar a outro a dedo.
Elvira Lama, voceira dos socialistas de Xinzo, explicou que mentres o alcalde intentaba desaloxar do seu posto ao arquitecto, colocaba no seu lugar a un substituto como persoal laboral indefinido por decreto, para que desenvolvese actividades de asesoramento, con contratos renovados anualmente. Así, este grupo da oposición considera que o técnico titular debe regresar o seu posto e o substituto abandonar o Concello, porque no anexo de persoal dos orzamentos do 2013, tan só figura un arquitecto.
Ademais, desde o PSOE critican o gasto na investigación privada para facer contratos a dedo de Antonio Pérez. Pois aseguran que ao mesmo tempo que fai este gasto, rebaixa o salario dos traballadores e aumenta as débedas do Concello, que debe facer fronte aos gastos xudiciais derivados das sentenzas que o condenan por unha serie de contratacións presuntamente ilegais.