Arroz, arepas e tortas para retomar a actividade da asociación Ignacia Gómez Paz
Esta organización de emigrantes retornados e inmigrantes iberoamericanos celebrou onte en Xinzo unha xornada gastronómica intercultural
REDACCIÓN
Twitter: @Dendealimia
Con moito sabor, Arxentina, Ecuador, Brasil, Venezuela, Chile e República Dominicana estiveron representados, onte á tarde na Casa da Cultura de Xinzo. Pois celebrábase unha xornada gastronómica intercultural, organizada pola asociación de emigrantes retornados e inmigrantes iberoamericanos Ignacia Gómez Paz.
Un colectivo de relevante importancia na vila, pois entre inmigrantes e emigrantes retornados que obtiveron a nacionalidade do país de destino, suman arredor de 200 persoas. Todos os que o desexaron puideron acalar por un ratiño a morriña degustando unha vez máis os pratos máis típicos de cada país. Houbo arroz ecuatoriano, segundo a presidenta da asociación Matilde, con muchísimos ingredientes y sumamente sabroso, e representando a Venezuela e Arxentina, arepas e tortas fritas.
Xé, técnico do Concello experto en temas de Emigración non faltou a cita. Contounos que este evento pretende ser un re arranque da actividade da asociación que estaba algo parada, e púxonos ao día de todo o que teñen preparado a partir de agora. Entre os planes destacan a celebración de exposicións con produtos representativos de cada país e a creación dun concurso literario con narracións que traten o tema da emigración e do retorno.
Os concelleiros de Benestar e Cultura, Manuel Cabas e Carlos Gómez tampouco quixeron perderse a festa que estivo animada con ritmos caribeños e as ganas de desfrutar de tódolos asistentes.