O cancro centrará o vindeiro taller da Escola Rural de Saúde da Limia
A cita será mañá, a partir das 16:30 horas na Casa da Cultura de Xinzo e correrá a cargo das traballadoras sociais da AECC de Ourense
REDACCIÓN
Twitter: @Dendealimia
Dotar de coñecementos sobre as enfermidades oncolóxicas e adquirir habilidades no manexo das reaccións emocionais provocadas por estas doenzas serán os obxectivos do obradoiro que organiza para mañá a Escola Rural de Saúde da Limia. A cita será a partir das 16:30 horas na Casa da Cultura de Xinzo e a actividade estará dirixida por dúas traballadoras sociais da AECC de Ourense, Olaya Romasanta e Rocío Taboada.
O programa da actividade repasará os aspectos básicos do cancro, prevención e coidados, o proceso de adaptación co seu conseguinte impacto emocional e a importancia da comunicación e o manexo das situacións de crise. Para acudir a este taller é necesaria a inscrición previa, ben no enderezo electrónico escolaruraldesaudedalimia@yahoo.es ou de maneira presencial na aula 2 da primeira planta da Casa da Cultura.