Danos de 4 millóns na Limia
REDACCIÓN
Twitter: @Dendealimia
Catro millóns de euros. Iso é o que lle custará á Limia a chegada de Qumaira, Ruth e Stephanie, segundo os números que fixeron os alcaldes da comarca. Feitas as contas do que valerá reparar a desfeita causada polos temporais, os rexedores de Xinzo, Trasmiras, Os Blancos, Baltar, Porqueira, Vilar de Santos e Sandiás reuníronse co delegado territorial da Xunta de Galicia, Rogelio Martínez. O motivo da reunión non foi outro que solicitar a axuda do organismo autonómico.
E é que o mal tempo asolagou por completo a comarca dificultando a actividade da que vive a meirande parte da poboación, a agricultura. En palabras de Antonio Pérez, alcalde de Xinzo, a maior parte dos terreos están hoxe inundados, o que impide que se sementen os cereais, e a colleita das patacas. A pesar de ser o sector primario o máis afectado, o certo é que os desperfectos en infraestruturas e edificios tamén son representativos. Os concellos atópanse desbordados: os danos son cuantiosos, hai moito desperfecto e nós non dispoñemos de medios, aclaraba Pérez. Ante esta situación decidiron actuar, e esta reunión con Rogelio Martínez é unha das súas bazas.