Tres feridos graves nun accidente en Xinzo, o peor deste mes na provincia

Vista de A Pena
Tres feridos graves nun accidente en Xinzo, o peor deste mes na provincia
Os vehículos colisionaron esta madrugada na estrada de Vilar de Barrio REDACCIÓN Un home de 29, unha muller de 45 e outra...

Os vehículos colisionaron esta madrugada na estrada de Vilar de Barrio

REDACCIÓN

Un home de 29, unha muller de 45 e outra de 76 anos resultaron feridos graves esta madrugada, tras unha colisión na que se viron implicados tres turismos na estrada que comunica a vila limiá co municipio de Vilar de Barrio. Trátase do accidente de tráfico máis grave rexistrado na provincia durante este mes de agosto, cun total de seis feridos.

O choque produciuse cerca das 00:30 horas, a altura do quilómetro 3,600 desta estrada local á altura do lugar de A Pena, moi preto da vila de Xinzo, tal e como indicou a Garda Civil de Tráfico. O home de 29 anos e veciño de Vilar de Barrio que resultou ferido de gravidade, viaxaba so no seu vehículo, e non levaba posto o cinto de seguridade, as outras dúas mulleres cuxo estado reviste gravidade viaxaban xuntas e eran naturais de A Bola.

As outras tres vítimas resultaron feridas leves. O condutor do coche no que viaxaban as dúas mulleres, e os dous ocupantes do terceiro vehículo implicado, un home e unha muller de Xinzo, de 42 e 34 anos respectivamente. Todos eles circulaban cos correspondentes elementos de seguridade.

Os afectados atópanse xa no complexo hospitalario de Ourense, mentres as autoridades investigan as posibles causas do accidente.