Folk psicodélico e hardcore comeflores en Sandiás

O grupo musical Grampoder compartiu algúns dos seus temas o sábado na Corte dos Bois

Grupos especiais para lugares especiais. A tenda-taberna A Corte dos Bois encheuse o sábado de folk psicodélico, hardcore comeflores, rock portátil e pop campestre da man de Grampoder.

Unha reinterpretación, a deste establecemento das formas máis tradicionais ao hoxe en día máis actual. A Corte dos Bois inspírase nas tabernas do século pasado para o seu concepto e esencia, pero enche a súa programación musical cos grupos máis innovadores, como é o caso de Grampoder.

Esta agrupación, composta por Le Roi e Martin Wu, fai música para “burlar as tormentas” e confesaba uns días antes de viaxar a Santa Ana en Sandiás, que era un sitio no que lles “apetecía especialmente” tocar. Garantían “coros, percusións raras e silbiditos”, promesa que cumpriron con creces.