A oposición limiá únese para esixir que o alcalde explique a súa situación xurídica

Solicitan un pleno extraordinario ante as sentenzas a acusan ao rexedor de desviación de poder e indicios de prevaricación

Despois da decepción e das escasas explicacións, sen presenza do alcalde, da reunión de voceiros celebrada o pasado luns, a oposición política do Concello de Xinzo uniuse para esixir a convocatoria dun pleno extraordinario. O obxectivo será que o rexedor, o popular Antonio Pérez, dea explicacións sobre cal é a súa situación xurídica. Os opoñentes políticos de Pérez súmanse ante as diferentes sentenzas que foi acumulando nos últimos tempos, e que o acusan de desviación de poder e prevaricación.

 Segundo varios maxistrados da provincia a conduta do líder político durante o pasado ano foi “irregular e constante”, ademais de realizada “con plena consciencia da súa ilegalidade por manter en nómina a determinadas persoas, pese aos reparos do secretario e do interventor”, amén do incumprimento do Real Decreto que restrinxía a incorporación de novo persoal nas Administracións públicas ao longo do 2012. Para o resto de partidos que teñen representación en Xinzo de Limia, esta situación “ten xerado inquietude e incertidume entre os habitantes da vila”, polo que son “merecentes dunha explicación do seu alcalde”, que esperan que de por fin durante esta sesión extraordinaria.