Máis de 2.000.000 € en luminarias LED

Unha luz LED por cada dous habitantes. Son as contas que resultan co ambicioso proxecto para mellorar a iluminación de Xinzo de Limia. Os traballos arrancaron nos últimos días e os operarios de catro empresas están substituíndo, en diferentes tramos, un total de 2.480 vellas luminarias. Máis en concreto, as actuacións lévanse a cabo nalgunhas rúas do casco urbano e nunha vintena de núcleos: Lamas, Boado, Porto Alto, Casas de Veiga, Ganade, Pidre, Piñeira Seca, Solveira, A Bruxueira, Lamas de Arriba, O Camo, Ganade, Outeiro, Regueiro, Corredoira, Gudes, Guntimil, Gorgozola, San Vitorio e Barreiro.

Está previsto que os traballos continúen a próxima semana cando empezará, en paralelo, a colocación das 2.130 restantes. Así, a actuación irase completando nas próximas semanas ata a substitución de 4.610 vellas luminarias polos novos dispositivos, que ademais de mellorar a visibilidade aforrarán un 70% o gasto de luz do Concello, o que permitirá ao executivo local destinar estes fondos a outras inversións. Cómpre recordar que a factura actual anual elévase ata preto de 258.500 euros e agora conseguirase rebaixar considerablemente apostando pola tecnoloxía LED.

A actuación desenvolverase ao longo das próximas semanas e suporá o cambio das lámpadas de todo o alumeado público do termo municipal, tanto da vila como do resto de núcleos de poboación.

A visibilidade mellorou considerablemente nalgunhas zonas nas que xa se substituíron as lámpadas, como na pista da Devesa ou no polígono, ademais do entorno do cemiterio e nas unións da Sitibal co centro da vila. A próxima semana comezarán os traballos para cambiar as vellas luminarias -de 100 vatios e que apenas iluminan- nos pobos de Xinzo de Limia.

Para a substitución de 4.610 vellas luminarias deste ambicioso proxecto, o Goberno Central, a través do Instituto para a Diversificación e Aforro da Enerxía (IDAE), aportará o 80% (1.495.000 euros), mentres que o 20% restante, que supón unha cifra de 375.000 euros, correrá a cargo das arcas municipais. En calquera caso, para a confirmación da axuda a entidade local tivo que comprometerse á financiación do 100% da inversión (é dicir, 1,87 millóns de euros).

Coa substitución dos puntos de luz tamén mellorará a calidade da iluminación e reduciranse as emisións de CO2, un aspecto ao que o executivo local de Xinzo lle concede unha especial relevancia.