A SGHN desconfía do proxecto LIFE debido aos antecedentes dos organismos involucrados
A organización confésase escéptica ante a vontade real das administracións e empresas, tras analizar o seu comportamento cara a natureza nos últimos anos
REDACCIÓNA Sociedade Galega de Historia Natural ven de analizar os antecedentes ambientais das empresas e administracións enroladas no proxecto LIFE Regenera Limia. O resultado foi o escepticismo acerca da vontade real destes protagonistas. Este programa europeo de tres anos de duración, conta cun orzamento de 2,2 millóns de euros, dos que a UE aporta un 50%, ten o principal obxectivo de facer compatible a actividade agropecuaria co bo estado das masas de auga da comarca. Segundo esta organización, os obxectivos sobre o papel son moi loables, pero á hora de analizar como ten sido a relación co medio ambiente da Confederación Hidrográfica Miño-Sil, a Consellería de Medio Ambiente, Coren, a Deputación, e Gas Natural, as esperanzas destes expertos redúcense.
A SGHN acusa aos diferentes organismos de ter mirado cara a outro lado ao longo dos anos, ante os problemas medioambientais que teñen afectado e afectan á Limia, desde a falta de caudal no río, ata a proliferación das macro-granxas industriais. Ante esta situación, aseguran que farán un seguimento detallado de LIFE, e avisan de que se tentan desvirtuar o proxecto cun novo malgasto de fondos públicos, porán os feitos en coñecemento das autoridades da Unión Europea.