Elvira Lama compromete un novo xeriátrico de 60 prazas na Devesa para que os maiores poidan seguir preto das familias

Xinzo funciona, que tamén é o lema da campaña de Elvira Lama á Alcaldía, porque atende as grandes necesidades do Concello con grandes proxectos como a transformación dos accesos ou un novo xeriátrico, pero tamén as pequenas, como a de facilitar a mobilidade das persoas maiores.

Neste sentido, comprométese á mellora dos servizos con proxectos como a construción dun novo xeriátrico de case 60 prazas na urbanización A Devesa.

A memoria de dito proxecto xa foi presentado á Xunta de Galicia, o que demostra a determinación da candidata para evitar que as persoas que precisan este tipo de atención teñan que afastarse das súas familias e trasladarse a outros municipios. “Non podemos ter aos nosos maiores lonxe das súas familias porque no seu pobo non haxa o servizo que precisan. Achegalos ás súas casas é un obxectivo polo que seguirei facendo todo o que estea na miña man”. Xunto a esta memoria, remitiuse á certificación catastral da titularidade do terreo no que se emprazaría a residencia, na urbanización A Devesa.

O compromiso de Elvira Lama para mellorar os servizos que se ofrecen aos maiores en particular e á poboación en xeral segue medrando. Así, tamén se compromete á creación dunha rede de transporte a demanda para facilitar o desprazamento á vila ás da xente que vive no rural de Xinzo de Limia, especialmente para aqueles de maior idade, e baixo previa cita.

Trátase, en definitiva, de mellorar a calidade de vida da poboación, para o que se incrementarán os servizos de proximidade como o comedor a domicilio ou o de podoloxía, ademais da creación de espazos de xantar en compañía nos centros sociais e talleres de acompañamento para os maiores cunha rede de voluntariado.

Ademais, Elvira Lama xa empezou a traballar no plan de recuperación das Casas Rectorais do concello, adquiríndoas para preservar o patrimonio e construír Casas do Saber e da Memoria. Ao mesmo tempo que se atenden as necesidades dos nosos maiores, tamén se recuperará o patrimonio inmaterial. O Xinzo que funciona seguirá achegando servizos aos cidadáns con Elvira Lama na Alcaldía.