A actuación que se levou a cabo implicou a colocación dun panel interpretativo para visibilizar e poñer en valor o patrimonio cultural e inmaterial asociado a igrexa e a súa contorna. O panel rectangular cun marco tipo Dibond instalouse sobre unha estrutura metálica con ancoraxes voantes de cor gris. Dita estrutura metálica situouse sobre o muro de perpiaño que da acceso ao atrio da igrexa facendo coincidir as perforacións coas xuntas da pedra. Os traballos tiveron lugar sobre a Igrexa de Santo Estevo cun grao de protección integral e dentro dos contornos próximos de protección de varios bens arquitectónicos: Cruceiro, Casa Reitoral e Forno e dun ben arquitectónico romano, A Ara de Sandiás, todos eles recollidos dentro do Catálogo do Plan Xeral de Ordenación Municipal. Desde este momento, a Igrexa de Santo Estevo terá de forma permanente as súas portas dixitais abertas aos veciños, peregrinos e turistas que pasen a visitala a calquera hora.
Os traballos leváronse a cabo a partir da aprobación contida na resolución da dirección xeral de Patrimonio Cultural da Xunta de Galicia que segue as indicacións do Manual de Sinalización Turistica. A demanda de instalación do panel foi realizada polo Concello de Sandiás a Axencia Galega de Turismo no contexto da celebración do V Aniversario da Igrexa de Santo Estevo na Parroquia de Vilar de Sandiás.
O texto do panel foi documentado e redactado por unha historiadora do Arte. Trátase dun panel interpretativo escrito en tres idiomas onde se reforza, de maneira especial, o comentario do singular retablo e hornacinas do escultor Francisco de Moure. Tamén contén un código QR que enlaza coa páxina web turismo. sandias.es onde se poderá ampliar información con moito máis detalle sobre todos os elementos importantes da igrexa.
Estamos ante unha auténtica xoia artística. Ten elementos que os estudosos encadran entre o estilo renacentista e tardo-gótico. O templo conserva no seu interior o retablo renacentista de Francisco de Moure, unha fermosa bóveda de cruzaría renacentista e as singulares portas de estilo manuelino da fachada principal (Oeste) e lateral (norte).
O Concello de Sandiás presenta outra iniciativa máis de sinalización de recursos turísticos, de patrimonio relixioso e de roteiros naturais como a Ruta de Avistamento de Aves nas Areeiras de Sandiás. A Concellería de Cultura e Patrimonio de Sandiás quere por en valor o patrimonio para conseguir que a veciñanza e a xente que nos visite coñeza e o valore e así tamén poder conservar e protexer estes recursos, porque o que non se coñece non se valora nin se coida.
Ao longo do ano do V Centenario da Igrexa tamén se levaron a cabo outros actos como vinte visitas guiadas por profesionais de Xeitura Patrimonio SCoopGal, charlas-conferencias como a do antropólogo e etnógrafo Manuel Mandianes sobre o significado antropolóxico do templo na vida das persoas, un renovado estudo sobre o retablo de Francisco de Moure, publicado non número 15 da Revista Lethes pola mestrado en patrimonio, Belén Gómez Manso e un folleto didáctico divulgativo sobre a Porta da fachada de entrada a igrexa de estilo manuelino.
