Un pendello dun veciño de Sarreaus convértese nun plató de televisión por un día
Gravouse un novo programa para a Televisión de Galicia
O pendello de Lola e Pepe Lamas nunca antes estivera tan ateigado de xente. Veciños e veciñas de Sarreaus e dos arredores achegáronse a súa casa para asistir á gravación dun novo programa para a Televisión de Galicia. Os humoristas Xosé Antonio Touriñan e Marcos Pereiro foron os encargados de por en marcha este proxecto
O novo formato comezará a emitirse a partir de xaneiro. O fío condutor é que os dous humoristas pasean por distintos pobos de Galicia coñecendo a súa xente, o seu día a día e compartindo con eles un día de gravación.
Así foi como fixeron en Sarreaus onde se achegaron no mes de outubro. Pasaron o día no pobo e ca súa xente. Descubriron que teñen no concello a primeira Asociación de Homes Rurais e moitas cousas máis que se poderán ver cando comece o programa da TVG.
Onte fixeron a presentación do material que gravaron no mes de outubro en exclusiva para tódolos asistentes. O escenario non puido ser mellor, un pendello dos veciños Lola e Pepe Lamas, adornado con dous tractores con pala e mesmo unhas colmeas. As cámaras de gravación mesturábanse coas rachas de leña. As risas e os aplausos indundaban o ambiente que tiña moito agroglamour.
Teremos que agardar ata o ano que ven para ver na gran pantalla a xente de Sarreaus protagonizando un espazo televisivo.