Exito de público para ver as pezas de Adolfo Fernández en Montalegre
ADOLFO FERNÁNDEZ DAFONTE expón no Ecomuseu do Barroso (Montalegre, Portugal).
Dende o 19 de febreiro de 2015, ata o 30 de xuño de 2015 co título: Oficios e Tradicións Populares de Galicia.
O artista, tamén colaborador deste diario é natural do Baño, Bande (Ourense). Escultor autodidacta e investigador das técnicas máis ancestrais de cocción do barro e do uso de fornos milenarios. Con amplo currículum de exposicións en salas e centros de grande parte da Comunidade de Galicia.
A mostra, unha colección de 40 pezas realizadas en arxila, tén como finalidade ofrecer unha merecida homenaxe ás mulleres e mailos homes do rural galego, que coa súa sabeduría ancestral, o seu traballo e a súa loita, foron devanando unha cultura forte e singular que labrou un país único, con identidade propia, chamado Galicia.
O sistema de cocedura das obras é froito da laboura de investigación e do traballo de varios anos experimentando cos fornos máis primitivos empregados pola humanidade dende que se creou a primeira peza de cerámica, fai arredor de 8.500-9.000 anos (Neolítico Cerámico). O forno é alimentado por excrementos de gando caprino, ovino e vacún e a queima pode durar ata 40 horas.
Logo de inaugura-la exposición, o presidente da cámara de Montalegre, Orlando Alves, destacou a figura do artista: "A pessoa do Adolfo, é em si, un monumento porque dá-nos a conhecer um aspeto completamente desmaterializado da produçâo artística. É un homen que produz para se enriquecer espiritualmente sem qualquer intuito materialista".