Nace LIMIAR, Asociación de Artesáns da Limia, con sede física no Museo da Limia
Un grupo de 10 artesáns vén de constituír a ASOCIACIÓN DE ARTESÁNS DA LIMIA, LIMIAR, en colaboración co MUSEO ETNOGRÁFICO DA LIMIA.
A súa finalidade é crear, producir, investigar e estudar bens artesanais, velando pola difusión, conservación, innovación, defensa e promoción da artesanía galega.
Os/as asociados/as, presididos/as pola costureira de Vilar de Santos, Mercedes Veites Pérez (Lumecú), posúen todos a carta de artesán/á de Galicia, e desenvolverán a actividade nos eidos da cestaría, olaría, instrumentos musicais, pantalla, costura, filigrana e prataría.
INAUGURACIÓN CON EXPOSICIÓN
A asociación comezará a súa andaina cunha exposición, que será permanente este sábado 11 de decembro a partir das 11:30 no Museo da Limia.
Despois da inauguración a asociación contará cun espazo permanente no citado museo, para expoñer e vender as súas creacións, os sábados e domingos de 11:30 a 13:30 e de 16:00 a 18:00 horas. O Museo será a sede da asociación e o lugar habitual de impartición de cursos e obradoiros.