Arnuide mellorará e saneamento e a depuración das augas
Construiranse oito pequenas fosas compactas con filtro biolóxico, de capacidade variable, entre 10 e 200 habitantes equivalentes
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e Manuel Conde Gómez, alcalde de Vilar de Barrio, rubricaron o convenio que determina o financiamento, redacción do proxecto, posta ao dispor dos terreos, execución e posterior entrega das obras de renovación das infraestruturas de saneamento e depuración do núcleo de Arnuide.
Na actualidade, este núcleo de 500 habitantes verte as súas augas residuais a varias fosas sépticas, colapsadas por un funcionamento incorrecto, o que conleva unha escasa ou nula depuración das mesmas. Doutra banda, estas infraestruturas de depuración atópanse dentro do dominio público hidráulico, o que ha de evitarse ao amparo da normativa vixente en materia de augas.
Para solucionar esta problemática a través do presente convenio a CHMS construirá oito fosas compactas con filtro biolóxico, con capacidade variable, entre 10 e 200 habitantes equivalentes. En cada unha das actuacións definidas será preciso executar un colector que intercepte co existente e conduza as augas residuais á nova depuradora, así como outro colector de alivio ao río para a evacuación das augas.
As novas fosas construiranse fóra do dominio público hidráulico e demoleranse os antigos equipos de depuración situadas dentro do mesmo.
O investimento necesario estímase en 815.000 Euros, incluíndo o custo de redacción do Proxecto, a execución do contrato de obras, así como a dirección facultativa do mesmo.