Díaz Mouteira inaugura o foro de expertos que buscarán solucións ao tema do botellón

141217 foro botellon
Díaz Mouteira inaugura o foro de expertos que buscarán solucións ao tema do botellón

A delegada territorial indicou que o botellón é "unha realidade difícil, un problema coñecido pero en absoluto resolto, ante o que é necesario intervir".

A delegada territorial da Xunta en Ourense, Marisol Díaz Mouteira, participou hoxe na inauguración dun foro que organiza a Consellería de Sanidade, o Concello de Ourense e a Fundación Galega contra o Narcotráfico, para buscar solucións ao problema do botellón. O salón de actos da Delegación Territorial acolle durante a xornada esta reunión na que participarán profesionais dos servizos sociais, sanidade e condutas aditivas, seguridade, educación, psicoloxía e socioloxía, e representantes da administración municipal, autonómica e estatal, así como representantes de colectivos xuvenís. Estes expertos aportarán a súa visión e proporán solucións concretas, cada un desde o seu ámbito de actuación.

O acto de inauguración contou coa presenza dun membro da Fundación Galega contra o narcotráfico

O acto de inauguración contou coa presenza dun membro da Fundación Galega contra o narcotráfico, Manuel Isorna; a xefa de servizo do Plan Nacional sobre drogas, Patricia Santa-Olalla; e a concelleira de Saúde e Benestar Social do concello de Ourense, Sofía Godoy.

Marisol Díaz lembrou que as altas taxas de consumo de alcohol constitúen un problema sanitario de primeira magnitude na sociedade actual, con importantes causas e derivacións de orde psicolóxico e social que afectan a toda a comunidade. Ademais, engadiu que o problema toma unha especial gravidade cando se fala de consumo na mocidade, porque incrementa notablemente as posibilidades de adicción, así como polos graves danos sanitarios, psicolóxicos e de relación que comporta.

A delegada territorial indicou que o botellón é "unha realidade difícil, un problema coñecido pero en absoluto resolto, ante o que é necesario intervir" e subliñou que a nosa sociedade ten a necesidade e a obriga de buscar e atopar solucións eficaces para garantir a saúde e o benestar de toda a poboación.