A Garda Civil iniciou unha campaña especial de motocicletas
Aumentouse a presenza dos axentes da Garda Civil de Tráfico naquelas vías de comunicación que son frecuentadas por grupos de moteiros.
Durante estes días festivos da Semana Santa, agraciados por unhas boas condicións climatolóxicas, é de prever que se dispoñan a gozar da circulación en motocicleta os amantes das dúas rodas, tras o parón invernal.
Desde o Subsector de Tráfico da Garda Civil de Ourense, faise un chamamento á prudencia por parte destes condutores, para que "extremen as medidas de seguridade e, sobre todo, moderen a velocidade e a adecúen ás condicións e ao trazado da estrada pola que circulen". "Gozar dunha motocicleta non é circular a gran velocidade, senon sentir a sensación de liberdade, o aire, o son do motor e poder chegar e estacionar en lugares aos que non se pode acceder nun turismo, para poder observar e deleitarse coa contorna que nos rodea", afirman dende Tráfico.
En relación co anteriormente exposto e en aras da concienciación dos motoristas, o pasado fin de semana realizouse unha Campaña Especial de Motocicletas, co obxecto de reducir a sinistralidade nas estradas, aumentándose a presenza dos axentes da Garda Civil de Tráfico naquelas vías de comunicación que son frecuentadas por grupos de moteiros, tendo en conta que esta é unha da medida máis efectivas para evitar e disuadir que se cometan infraccións que poñan en perigo tanto a integridade física dos motoristas como doutros usuarios das vías. Como resultado destes servizos, foron controladas 216 en estradas convencionais e 53 en autovía. De todas elas, denunciáronse 2 por rodas lisas, 5 por exceso de velocidade e 6 por irregularidades documentais.