MEDIO RURAL AVALÍA COS CONCELLOS AFECTADOS MEDIDAS PALIATIVAS DOS DANOS DO PEDRAZO NA ZONA OURENSÁ DA LIMIA
Estúdanse posibles beneficios fiscais e melloras nas condicións dos seguros agrarios
A conselleira do Medio Rural, Ángeles Vázquez, reuniuse hoxe en San Caetano cos alcaldes de Xunqueira de Ambía, José Luis Gavilanes, e Sandiás, Felipe Traveso, e co concelleiro de Vilar de Barrio, José Manuel Souto. Avaliou con eles os distintos informes de valoración de danos aos cultivos e ás zonas afectadas polo episodio de pedrazo do pasado día 6 de xullo.
A titular de Medio Rural informou aos representantes municipais de que se están a estudar as posibles medidas de apoio aos agricultores afectados, especialmente nos cultivos de cereal (trigo) e de pataca. Entre as principais medidas a habilitar, barállanse a de garantir a liquidez dos préstamos das explotacións afectadas mediante bonificacións ou outras liñas de financiamento. Tamén, solicitar á administración do Estado a redución de módulos do IRPF para os afectados.
Outra medida avaliada nesta xuntanza é a posibilidade de propor á Comisión Territorial de Seguros Agrarios melloras nas condicións das pólizas, así como o posible incremento nas subvencións para a contratación de seguros agrarios.