“Patatas Ama”: O salto do comercio local ó nacional

O seu fundador, Amador Díaz, admite que cando iniciou esta andadura, comezou a traballar cunha clientela que pensaba que o esquecería pronto. “É algo que ocorre a miúdo cos productos de temporada, dun ano para outro pódense perder moitos clientes”, afirma. Ó ano seguinte decatouse de que iso non ocorría coas súas patacas: “As peticións dos clientes eran constantes e o grauciño de area ía medrando”.

O xerente das patacas limianas móstrase satisfeito de que ese pequeno grao continúe a medrar, ata que algún día se convirta en montaña. Polo momento, “Patacas Ama” xa conta coa súa primeira contratación: un novo integrante na plantilla que se encargará exclusivamente da venta telemática.
Amador, lonxe de fachendear, recorda as dificultades dos seus comezos: “ó principio, ninguén cría en min, en que podería acadar os obxectivos que me plantexaba”. O tamén tenente alcalde de Xinzo recorda cun certo ton melancólico as dificultades que atravesou a empresa na que tanto tempo e esforzos ten invertido. Entre outras cousas, o confinamento e a posterior crise exonómica e social provocada polo coronavirus: “O 2020 está a ser un ano complicado para todos e coma moitas outras empresas locais, Patatas Ama non estaba preparada para todo o desbaraxuste que se produciu”.

Agora, con distancia, Amador saca algunhas cousas positivas daquel mes de abril que tanto custou superar. Está especialmente orgulloso de ter axudado ós seus compañeiros, “ou polo menos intentalo” -engade entre risas-. O limián explica que a pataca por antonomasia, a máis demandada, acostuma a ser a Kennebec así que o crecemento do reclamo de pataca agria supuxo unha sorpresa e unha gran noticia para os agricultores da zona: “Creo que o máis importante foi a promoción que lle fixemos á propia pataca da limia, ata onde chegou”.

O produto gustoulle á xente e, polo momento, está a repetir. “Todos os clientes do primeiro ano ségueno sendo na actualidade”, explica Amador, “(...) Incluso moitas persoas maiores que non controlan Internet continúan a chamarme por teléfono para facer os pedidos, sete anos despois”.

Patatas AMA, non descarta o salto a Europa o ano que ven

“Patatas Ama” non se limita ó ámbito provincial: o seu fundador explícalle a este xornal que a agria limiana ten chegado a fogares de toda España. “Debido a algunhas peticións que recibimos de Alemaña”, dende a empresa “non descartamos a opción dos envíos internacionais entre esta tempada e a seguinte” -previo estudo da trazabilidade do produto e dos custos do transporte-.

Amador traballa nestes momentos con tres transportistas: dous con sede en Xinzo e outro con sede en Ourense. En etapas anteriores, a empresa contaba cun só portador, pero o crecemento da compañía acadou un volume tal que comezou a ser inabarcable.

As expectativas de venta deste ano son nada máis e nada menos que do 100% da produción. No pasado mes, “Patatas Ama” recibiu aproximadamente uns 1.600 pedidos; botando unhas contas rápidas e deixando a pertienente marxe de erro, Amador conta con vender uns 30 mil kg/mes durante os próximos seis ou sete meses.

E, como se prepara a empresa limiana para este futuro?

En primeiro lugar, xa cambiamos o cartón por sacos, para que as patacas respiren.Continuamos coa mecanización do selado das caixas e estamos a ampliar as nosa nave cunha pequena inversión en almacenamento e envasado, “Patacas Ama” contará dende agora cunha cámara onde se regularán temperatura e humidade coa intención de conservar un “pouquiño máis” o produto.

Sobre os competidores, o fundador de “Patas Ama” teno claro: “eu sempre dixen que a competencia era boa”. “Ó fin e ó cabo, o mercado é moi grande e eu tampouco teño capacidade para cubrilo todo”, conclúe.