O PSDEG-PSOE DENUNCIA QUE XINZO DE LIMIA QUEDARÁ SEN SERVIZO DE POLICÍA LOCAL EN PLENA NOITEBOA OU NO DÍA DE NADAL POR CULPA DA INCOMPETENCIA DO GOBERNO DO PP

O PSdeG-PSOE de Xinzo de Limia denuncia que a vila quedará sen servizo de policía local en plena Noiteboa e durante o día de Nadal, por culpa da “nefasta xestión e da incompetencia absoluta” do goberno local do PP á hora de xestionar os recursos públicos. “A única política de persoal que aplican con celeridade é a dos enchufes innecesarios, tal e como sentenciu a xustiza”, afirman os socialistas. Actualmente o cadro de axentes quedou reducido a só oito efectivos, unha cifra que imposibilita cubrir todas as quendas de traballo as fins de semana ou os xornadas festivas. Esta pésima situación deixará desatendidas as necesidades de seguridade e urxencias dos 10.000 habitantes de Xinzo, ó mesmo tempo que se forza e sobrecarga ós traballadores nas súas tarefas.

O cadro de 15 axentes da policía local está actualmente minguado á case metade porque dous traballadores están adscritos a tarefas administrativas; outro acaba de xubilarse; outros dous aínda non foron convocados ó proceso de formación preceptivo e previo á incorporación a súa praza; e outros dous atópanse desfrutando de xornadas de vacacións. A portavoz local dos socialistas, Elvira Lama, denuncia a “irresponsabilidade continuada e reiterada do alcalde, que é o xefe último do corpo policial, e todo e o goberno do PP xa que este problema de falta de efectivos sucede cada dous por tres desde hai tempo sen que lle poñan solución”.

“O que esta a acontecer con este servizo básico é inaudito, xa que temos un goberno local ó que lle urxe máis gastar decenas de miles de euros en propaganda e publicidade que en policías para seguridade das persoas”, asevera a voceira antes de recordar que a Noiteboa é unha data con moita actividade hostaleira e de ocio que require da presenza de axentes de garda. Lama lamenta a “falta de seguridade que o PP vai provocar entre a veciñanza” e salienta que o número de efectivos é manifestamente insuficiente segundo o que lle corresponde ó municipio polo seu número de habitantes, tal e como xa ten manifestado o xefe da policía de Xinzo e como destacan desde o PSdeG-PSOE: “o municipio debería contar con 15 axentes e actualmente só temos oito traballadores nas rúas, unha cifra que imposibilita cubrir os sete días da semana”.

“Deberían contratar persoal e mellorar as quendas, pero a incompetencia do PP é tan grande que incluso ignoraron cadros de quendas de traballo diferentes ó actual, presentados polos respresentantes sindicais, que permitirían paliar temporalmente este déficit sen incrementar voluminosamente os gastos”, relata. A portavoz recorda que, nos últimos meses, o grupo municipal socialista xa alertou deste mesmo problema en varias ocasións “pero vergoñentamente o goberno local quedou de brazos cruzados”, e destaca que, de novo, o concello acumula atrasos de medio ano no pagamento das horas extraordinarias realizadas polos membros do corpo policial.