Sábado en familia no Couto Mixto

No atrio da igrexa
Sábado en familia no Couto Mixto

O máis grande privilexio de pertencer ao Couto Mixto era o do autogoberno

Na mañá de sábado de outono xuntámonos un grupo de máis de vinte persoas convocados para pasar un sábado máis en familia, nesta ocasión coa idea de coñecer mellor o Couto Mixto, este territorio que temos aquí ben cerca de nós e que durante sete séculos foi independente de España e Portugal. Probablemente un dos primeiros estados democráticos da historia de Europa.
Cun guía de luxo, o Cesáreo, “home de acordo” recorremos algúns dos espazos máis significativos de Santiago de Rubiás, un dos tres pobos xunto con Rubiás e Meaus, que constituíron unha república de vinte e sete quilómetros cadrados entre dous imperios que se repartiran case o planeta pero deixaron este anaco esquecido (¿?).

No atrio, na igrexa, na sancristía, na antiga reitoral, no diestro... seguimos atentos as explicacións deste veciño, Cesáreo González, que nos contou a lenda que explica o inicio desta curiosa historia e o final co tratado de Lisboa, en 1864 polo que os Pobos Promiscuos, tres aldeas da raia, se integraron en Portugal e a cambio as tres aldeas do Couto Mixto integráronse en España. Fixéronos españois dunha brochada, e catro anos despois empezaron a cobrarlles impostos e os mozos tiveron que facer o servizo militar.
Despois achegámonos ata Meaus, a aldea máis comercial das tres: tiña banco, farmacia, a casa do sal... Impresionantes construcións coas entradas ben protexidas. Rematamos a mañá cun tranquilo paseo comprobando o baleiros que están os nosos pobos e ó tempo valorando as oportunidades que nos ofrecen.

Esta actividade é financiada pola consellería de Política Social da Xunta de Galicia a través da subvención con cargo á asignación tributaria do 0,7% do imposto sobre a renda das persoas físicas dentro do programa “O noso espazo: encontros de familia, parentalidade positiva e actividades educativas” do CDR O Viso.

https://www.kizoa.com/Movie-Maker/d389213530k7502814o2l1/Sábado en familia no Couto Mixto