A XUNTA INVESTIRÁ PRETO DE 30 M€ O ANO QUE VÉN PARA IMPULSAR AS PLANTACIÓNS, A SILVICULTURA E A BOA GOBERNANZA DOS MONTES GALEGOS
Deles, 4,5 millóns para unha nova liña de axudas que promoverá as plantacións de castiñeiros e a recuperación de soutos tradicionais
A Xunta investirá preto de 30 millóns de euros o ano que vén para impulsar as plantacións, a silvicultura e a boa gobernanza dos montes galegos. Así o destacou o conselleiro do Medio Rural, José González, que -acompañado do director xeral de Planificación e Ordenación Forestal, José Luis Chan- preside hoxe a xuntanza do Consello Forestal de Galicia, que ten lugar no pazo de Quián, no concello coruñés de Boqueixón.
En concreto, segundo desglosou o titular de Medio Rural, destinaranse 12,7 millóns de euros (un 68 % máis que neste 2021) ás axudas de forestación e primas de mantemento, mentres que para as achegas de silvicultura e boa gobernanza das comunidades de montes veciñais se consignan 10,5 millóns. Así mesmo, destacou a nova liña para fomentar as plantacións de castiñeiros e a recuperación de soutos tradicionais, dotada con 4,5 millóns de euros.
Na reunión do Consello Forestal de hoxe tamén se tratarán varias cuestións relacionadas cos obxectivos do Plan Forestal de Galicia 2021-2040 “Cara á neutralidade carbónica”, que se publicou recentemente no Diario Oficial de Galicia. Así, segundo afirmou o conselleiro, trataranse os avances na elaboración do Inventario forestal continuo en colaboración coas universidades de Santiago e Vigo, para contar cun sistema de monitorización propio das masas forestais que constitúen o monte galego e da súa evolución. Tamén se abordará o Programa estratéxico do souto e da castaña, que se terá listo no primeiro quinquenio do período marcado polo Plan Forestal.
A maiores, no encontro constituirase un grupo de traballo para avanzar no uso sociorrecreativo dos montes veciñais, unha das finalidades marcadas tamén no Plan Forestal de Galicia. Trátase de ordenar e regular os usos e actividades sociorrecreativas a desenvolver nos diversos montes ou terreos forestais en aras da conservación e da protección do medio natural. Tamén se persegue a promoción do uso social ou turístico do monte mediante o establecemento dunha rede de infraestruturas verdes en contornas urbanas e en zonas de especial interese paisaxístico.
Na orde do día, consta ademais a avaliación dos traballos feitos para combater a avespiña do castiñeiro, que teñen constatado o asentamento nos soutos galegos do parasito Torymus sinensis, empregado dende o 2015 para o control biolóxico desta praga. Nesa liña, unha vez analizados todos os puntos onde se colleron mostras de bugallas tras as soltas do ano 2020 recuperáronse 3.158 exemplares do parasitoide, o que supón máis do dobre do recuperado en todas as campañas anteriores de 2016 a 2019. No que respecta ao plan de control deste ano 2021, a Consellería do Medio Rural soltou preto de 1,6 millóns individuos de Torymus. Canto ao investimento, superou os 2,2 millóns de euros, o que supón un incremento próximo ao 3 % con respecto ao presuposto do pasado exercicio.