A Banda de Gaitas de Xinzo volve representar a Galicia e a España nun festival da República Checa
A Banda de Gaitas de Xinzo estará en Strakonice, do 25 ao 28 de agosto, tocando e actuando nas rúas da cidade cunha formación de 40 músicos e 4 bailaríns (dúas parellas de baile tradicional galego do Real Coro Toxos e Froles de Ferrol). Ademais, comentan que contarán coa axuda de saxofonistas do Conservatorio Profesional de Música de Xinzo.
Dende a banda, agradecen a Xosé Lois Foxo, director da Escola Provincial de Gaitas de Ourense, pola súa mediación para participar no festival e á xunta directiva e bailadores do Real Coro Toxos e Froles de Ferrol pola súa colaboración, e ao claustro de profesores e saxofonistas do Conservatorio Profesional de Música de Xinzo.
Do mesmo xeito, agradecen o apoio e xestións da alcaldesa e Concello de Xinzo de Limia, xunto coa Deputación Provincial de Ourense.
Con este evento pechan o calendario de verán deste ano que comezou en xuño coa súa participación no XVIII Alcuentru Bandes de Gaites, Castrillón (Asturias) e despois no XXV Festival de Bandes de Gaites “Villa de Candás”.