Incremento das infraccións penais, correspondente cun lixeiro aumento dos delitos telemáticos e contra o patrimonio

Onte celebrouse de maneira telemática a reunión da Xunta Local de Seguridade do concello de Xinzo coa copresidencia do Subdelegado do Goberno e a alcaldesa Elvira Lama.

No tocante á seguridade cidadá, o subdelegado do Goberno destacou o incremento da actividade da Garda Civil en canto ao número de investigados e un incremento das infraccións penais, correspondente cun lixeiro aumento dos delitos telemáticos e contra o patrimonio.

Actualmente no concello de Xinzo de Limia hai activos no sistema VioGén oito casos

Acordouse impulsar o Plan Director para a Convivencia e Mellora da Seguridade nos Centros Educativos e nas súas contornas en canto a situación da pandemia o permita. O obxectivo é incrementar nos centros escolares de Xinzo de Limia o número de charlas informativas dos equipos especializados das Forzas e Corpos de Seguridade sobre o uso das novas tecnoloxías, sobre o acoso escolar, sobre a violencia de xénero, sobre a prevención de condutas aditivas (consumo de alcohol e drogas, así como adición ao xogo) e outras actividades.

Así mesmo, reforzarase a vixilancia nas inmediacións dos centros educativos para combater e previr o tráfico, consumo e tenencia de drogas, así como todo tipo de condutas violentas.

Como outro dos puntos da orde do día estableceuse a activación do Plan Estratéxico de resposta policial ao consumo e tráfico de drogas minorista en zonas, lugares e locais de ocio do concello de Xinzo de Limia, a través do cal as forzas e corpos de seguridade desenvolverán actuacións para previr e reducir a oferta de drogas aos consumidores, especialmente entre a mocidade, e previr a condución de vehículos a motor baixo a influencia de bebidas alcohólicas ou drogas tóxicas.