A osteoporose, unha enfermidade silente na que é básica a prevención
A Escola Rural de Saúde da Limia ven de celebrar unha campaña de intervención sobre esta enfermidade
REDACCIÓN
Twitter: @Dendealimia
A osteoporose é unha enfermidade perigosa. Por iso, a Escola Rural de Saúde da Limia cumprindo coa súa misión de promoción e prevención da saúde, organizou unha campaña de intervención desta enfermidade en colaboración co profesional da farmacia e a ortopedia Pablo Vivanco. A actuación baseouse en dous obradoiros celebrados entre o 16 e o 21 de xuño na Casa da Cultura de Xinzo e o Centro Social de Arnuide. Uns talleres impartidos pola fisioterapeuta Lorena Pérez coa finalidade de dar a coñecer esta doenza metabólica e dexenerativa na que os ósos se volven máis fráxiles e propensos a fracturarse. O perigo da osteoporose radica na súa condición de enfermidade silente, non presenta dolor, nin síntomas, por iso nestas actuacións quixeron recalcar que é fundamental ter coñecemento sobre como actúa para levar a cabo a axeitada prevención. Doutro xeito, esta patoloxía, a máis común entre os padecementos crónicos do esqueleto, convértese na causa máis frecuente, nun 80% dos casos, da rotura de cadeira, o que pode desembocar noutras complicacións e incluso na morte.
Esta enfermidade afecta masivamente ás mulleres, tal e como confirman os datos da OMS e as probas de densidade ósea realizadas a todas as veciñas da Limia que así o desexaron, grazas á colaboración dos Concellos de Xinzo, Vilar de Barrio e os Blancos, así coma á Comunidade de MVMC San Mamede e Medo de Arnuide. A osteoporose pode atoparse en máis do 30% das mulleres posmenopáusicas e ente os seus factores de risco destacan o sedentarismo, a idade avanzada, a menopausa precoz e a dieta pobre en calcio.