Preto de 150.000 euros para mellorar a seguridade viaria en Xinzo
A Xunta inverte na construción dunha glorieta na estrada de Bande onde conflúen tres viarios
REDACCIÓN
O Conselleiro de Medio Ambiente, Territorio e Infraestruturas asinou esta mañá co rexedor limiao, Antonio Pérez un convenio de colaboración para mellorar a estrada que vai a Bande, a OU-301. A actuación desenvolverase concretamente no punto quilométrico 0+770 coa construción dunha glorieta e así, mellorar a seguridade viaria.
Concretamente nesta intersección da estrada OU-301, nos límites urbanos da vila, conflúen tres viarios: o das rúas Pista da Armada e Dous de Maio e a estrada provincial OU-1112. Na actualidade, este tramo de cinco saídas resólvese mediante un carril de xiro.
Hernández explicou que a reforma desta intersección ten como finalidade mellorar a seguridade viaria mediante o deseño e construción dunha glorieta que distribúa a circulación. Así mesmo, ampliarase a calzada nos treitos nos que sexa necesario e rehabilitarase o firme existente.
Outras actuacións en Xinzo
Hernández tamén lembrou que o seu departamento ten en marcha obras no concello de Xinzo por importe de máis de 500.000 euros que permitirán mellorar o saneamento de diferentes zonas do municipio, como é o caso da conexión do Pobo da Pena coa depuradora de Trandeiras e o colector xeral de San Pedro de Laroá, dúas actuacións que estarán rematadas o vindeiro mes de maio.