PSOE e ANOVA únense á Plataforma en Defensa do Partido Xudicial de Xinzo
A organización celebrou o pasado mércores a súa primeira xuntanza na Casa da Cultura
REDACCIÓN
Twitter: @Dendealimia
PSOE, ANOVA e diversos profesionais do sector da xustiza son as últimas fichaxes da Plataforma en Defensa do Partido Xudicial de Xinzo. Estas forzas únense así a CxG, BNG, SLG, CIG e o Concelho de Vilar de Santos. Esta organización celebrou o pasado mércores a súa primeira xuntanza na Casa da Cultura da vila onde os presentes abordaron os temas relacionados coa organización e funcionamento da propia Plataforma e a acción cidadá que van levar a cabo.
En canto a organización, adoptaron un logotipo e sentaron as bases mínimas de funcionamento do organismo, desde o nomeamento dun voceiro ata cal será o procedemento de toma de decisións, por votación e maiorías nunha Asemblea Xeral. Comezaron así mesmo os traballos de deseño dunha campaña publicitaria que informe á cidadanía da comarca sobre as consecuencias que carrexará a perda do Partido Xudicial en Xinzo de Limia.
A próxima reunión da Plataforma, na que se presentarán as propostas de campaña publicitaria, quedou fixada para o día 30 de Abril, ás 20.00 horas na Casa de Cultura de Xinzo de Limia.