Ramiro Rodríguez: a saída máis lóxica é que Pérez marche para a casa
Desde o grupo nacionalista consideran que o que está pasando co alcalde está facéndolle moito dano ao propio Concello e os veciños
MARÍA FERNÁNDEZ ROMERO
Despois de que La Voz de Galicia publicase esta mañá a nova sobre a imputación de Antonio Pérez por un presunto delito de prevaricación, tamén falamos co voceiro do BNG en Xinzo, Ramiro Rodríguez. E el teno moi claro: a saída máis lóxica para esta situación é que marche para a casa e deixe que alguén acabe a lexislatura. O que está pasando co alcalde, a continua presenza deste caso na prensa, está facéndolle moito dano ao propio Concello e os veciños, argumentaba o nacionalista.
Tampouco había sorpresa nas verbas de Ramiro Rodríguez ao falar da imputación de Antonio Pérez. É máis, o líder nacionalista recordaba que desde o BNG xa diciamos desde hai tempo que isto víase vir. O que tamén teñen claro neste grupo da oposición é que esta xa é un situación insostible, Pérez xa tería que ter dimitido cando se coñeceron as primeiras sentenzas. Unhas sentenzas que xa chegan a nove e que anulan outros tantos contratos elaborados polo Concello de maneira ilegal en 2012.
En canto a se Pérez dimitirá ou non, por moito que llo pida a oposición, desde o BNG móstranse escépticos: desde hai un mes cara aquí percibimos que el ten toda a intención de rematar o mandato. De feito, máis ben parece que está intentando reconducir o que vai acontecendo para manterse no poder, explicaba Rodríguez. A pesar de todo, seguen solicitando que presente a súa dimisión inmediatamente.