Unhas vacacións diferentes co CDR O Viso
Lodoselo acollerá un campamento infantil durante nove días desde o 28 de xuño
REDACCIÓN
Twitter: @Dendealimia
Se tes entre 5 e 13 anos e ganas de pasar un verán diferente, o CDR O Viso prepara un campamento entre os días 28 de xullo e 6 de xullo. Nove días de diversión nos que os organizadores ofrecen dúas modalidades de estancia diferentes, un campamento de réxime diúrno, co transporte de Xinzo de Limia a Lodoselo incluído e outro en réxime de pensión completa. Será algo máis dunha semana de actividades na natureza, roteiros de orientación, xogos, obradoiros, reciclaxe, piscina, deportes ao aire libre e veladas.
Nestes campamentos, os nenos somérxense na vida do rural, adaptándose á natureza e gozando das súas posibilidades. É un lugar de encontro, onde se fomenta a convivencia, o contacto coa natureza, a interxeracionalidade, e o respecto ó entorno a partir de actividades diferentes.
Ademais desde o CDR O Viso apostan pola integración, e polo tanto haberá prazas para pequenos con necesidades educativas especiais. O centro cumpre tamén, coa normativa vixente de accesibilidade e eliminación de barreiras.
Preinscrición e descontos
As prazas son limitadas polo que é necesario formalizar a preinscrición antes do vindeiro 6 de xuño no CIX da Limia. Ademais, existen descontos especiais para dous ou máis irmáns.