Xinzo Adiante quere saber a incidencia do cancro no noso concello

Xinzo Adiante vén de rexistrar unha moción para elevala ao seguinte Pleno ordinario, instando á Xunta de Galicia a realizar un estudo sobre a incidencia do cancro na nosa comarca e as causas que o provocan e a adopción de medidas preventivas para paliar a especial incidencia desta enfermidade na Limia, en xeral, e no noso concello en particular.

Desde Xinzo Adiante consideramos que sería moi positivo que se fixese un estudo de cales son os axentes que provocan esta enfermidade, que afecta a moitas persoas na nosa comarca. Coñecendo as causas e axentes que a provocan e adoptando as medidas preventivas necesarias, poderíanse reducir considerablemente os casos desta enfermidade, así como as consecuencias da mesma ás persoas que a sofren.

Evidentemente, a realización dese estudo e a adopción de medidas preventivas son competencias que transcenden o ámbito municipal. Pero o Pleno do Concello si ten a capacidade de instar a Xunta de Galicia a realizar as actuacións que propoñemos.

Por iso, solicitamos ao grupo de goberno e ao resto de grupos da oposición que apoien a moción que presentamos por varios motivos: é unha cuestión de saúde, non de ideoloxía, que afecta ás persoas con independencia das súas ideas; non supón ningún gasto engadido para os orzamentos municipais; e é responsabilidade das distintas administracións e forzas políticas velar pola saúde da cidadanía e adoptar as medidas preventivas axeitadas para protexer as persoas.