Ourense acolle esta fin de semana un seminario de comunicadores meteorolóxicos de España

Ourense acollerá esta fin de semana un seminario onde participarán medio centro de comunicadores meteorolóxicos de toda España. Así, a Asociación de Comunicadores Meteorolóxicos de España, ACOMET, desenvolverá na provincia o seu VI Seminario a nivel nacional, que consistirá en diversas charlas matinais abertas ao público en xeral, que terán lugar no Centro Cultural Marcos Valcárcel e no Liceo de Ourense.

 A Deputación apoia esta iniciativa, que non só está pensada para divulgar a importancia da comunicación meteorolóxica, senón que servirá tamén para amosarlles aos participantes algúns dos enclaves máis singulares da provincia, como é o caso da Ribeira Sacra. De feito, na presentación deste seminario estivo presente o deputado provincial de Medio Ambiente e Enerxía, José María Lago, así como por parte da organización do Seminario de ACOMET asistiron tamén os comunicadores e meteorólogos Susana Bayo e Marcos Tesouro, quenes animaron á veciñanza a participar nas charlas previstas, tanto o sábado a partires das 10.00 horas no Centro Cultural Marcos Valcárcel, como o domingo no Liceo, onde se profundizará en asuntos como a meteoroloxía, a climatoloxía, ou cambio climático, entre outros.