O BNG denuncia que se agrava a crise pediátrica en Xinzo

Camilo Vila, voceiro municipal do Bng de Xinzo lamenta que se cumpra un dos escenarios que advertiu nas últimas reunións co Grupo de Goberno. Malia a boa vontade predicada polo Partido Popular, os feitos indican que o servizo de pediatría de Xinzo corre un grave risco. Dende o verán unha das facultativas atópase de baixa e o remendo da xerencia do Sergas é “absolutamente insuficiente”, apunta Vila, e nos últimos día o pediatra que continuaba á fronte do servizo atoparase temporalmente incapacitado o que provoca outro “parche”.
Cando o recomendado pola poboación que atende son ter servizo de pediatría 80 horas á semana, agora mesmo o centro de saúde de Xinzo ten servizo de pediatra unicamente 20 horas (media xornada) e 9 horas de puericultura. 

Camilo Vila alude tamén á improdutividade da reunión mantida a semana pasada co resto da Corporación municipal onde quedaron invalidados tanto o argumento de que non hai pediatras coma o de que é imposible administrativamente cubrir o servizo: “desconfío moito de quen di que non hai solucións pero que recoñece que si que as había cando a xente se rebela”.
Os argumentos esgrimidos polo líder nacionalista son tamén validados polo sindicato CiG-Sanidade.
Vila advirte de que “é unha irresponsabilidade mandar a calquera neno ou nena menor de catro anos directamente ó servizo de Urxencias do CHUO pola conxestión do servizo e polo que significa tal volume de desprazamentos”.