Cantámoslle os Reis do Quiquiriquí: Se non nos dan nada, marchamos de eiquí
O CDR pechou o ciclo dos reis cantando en varios pobos da Limia, xunto cos cativos e maiores
Na mañá do venres 5 de xaneiro cantaron os
últimos reis desta tempada. Foron a Santa María de Couso da Limia,
parroquia do concello de Sandiás, acompañadas dun gran número de veciñas
e veciños que quixeron participar, ademais dalgúns nenos e nenas do CEIP de
Sandiás. Pasearon o pobo, petando de porta en porta, co lema: “Cantámoslle
os Reis do Quiquiriquí, se non nos dan nada marchamos de eiquí”. ¡Rematou a
xornada repleta de aguinaldos!
Ademais, ó longo destas dúas semanas festivas de Nadal, tamén cantaron os reis
en Sarreaus, Lodoselo e Laroá.
O último día lectivo do ano, a xente do #CDR O Viso unímonos ó CEIP de
Sarreaus. Xa son varios anos de colaboración para manter unha tradición tan
senlleira do Nadal limiao. Saímos do colexio con cunchas, pandeiretas e demais
instrumentos coa ilusión de atopar quen nos dese un aguinaldo. A primeira
parada foi no Bar Caserío, onde nos agardaba a clientela habitual e tamén as
persoas do noso Centro de Inclusión en Lodoselo; fomos ó concello e amenizamos
as rúas de Sarreaus durante parte da mañá coas nosas pezas de sempre: Nadal de
Laroá, o Patronciño, os Reis de Bustelo... pezas tradicionais da nosa zona e
que estamos conseguindo manter no repertorio actual.
En Lodoselo, cantamos polo pobo, dende a Vivenda Comunitaria ata o Centro de
Inclusión, onde nos agardaban, como cada ano, as persoas maiores e as
compañeiras para animar a actuación. Neste caso acompañáronnos os cativos e
cativas cos que esa mañá de Nadal estivemos gozando dunha xornada de Pobo
Escola por Lodoselo.
En Laroá, as veciñas e veciños reuníronse no Centro Social do pobo, onde
poidemos desfrutar dunha tarde de música, comunidade e unha boa chocolatada.
Cheos de aguinaldos despedímonos ata a próxima: “Déanolo aguinaldo a xentiña
desta casa que para o ano que vén xa lles darémo-las grazas”
E que de hoxe nun ano!
Esta actividade está financiada pola Consellería de Política Social da Xunta de
Galicia na subvención destinada á realización de programas de interese social,
con carga á asignación tributaria do 0,7% do IRPF e pola Deputación provincial
de Ourense a través da subvención para proxectos de prestación de
servizos sociais.