Amador Díaz impulsa as relacións internacionais co sector agrícola ecuatoriano
As autoridades locais, encabezadas polo prefecto Manuel Caizabanda. acompañaron ó alcalde de Xinzo nas súas reunións en Ecuador.
O alcalde de Xinzo de Limia, Amador Díaz, continúa coa visita oficial á provincia de Tungurahua, Ecuador, programada entre os días 10 e 15 de abril. Durante a súa estadía está compartindo a experiencia de Xinzo de Limia como un referente internacional na modernización do sector primario e a economía circular, co obxectivo de impulsar o desenvolvemento agroindustrial sostible de ambas rexións.
Amador Díaz, acompañado por autoridades locais co prefecto Manuel Caizabanda á cabeza, realizou un completo percorrido polo Frente Sur Occidental de Tungurahua, onde visitou instalacións de produción de pataca e procesamento de froitas. Nestas visitas, o alcalde puido observar de primeira man as técnicas e procesos empregados en Ecuador para optimizar a produción, reducir o impacto medioambiental e xerar valor engadido aos produtos locais.
O xoves día 11 de abril realizou unha visita á Asociación de
Produtores Agrícolas de Rubro Papa "AGROPAPA" en Montalvo, onde
coñeceu o procesamento e comercialización de snacks a base de pataca.
Tamén visitou a Planta de Procesamento EXPROFRUT do Canal Mocha
Huachi en Cevallos, onde presenciou a colaboración entre o sector
público e privado na comercialización de polpas de froitas naturais.
En Quero, Amador Díaz chegou ó Centro de Acopio e
Comercialización de Patatas e ó Centro de Produtores CECOPAQ, onde
se destacou a ampla produción e o arduo traballo dos agricultores locais. En
Mocha foi recibido polo alcalde Danilo Ortiz e as autoridades locais,
quen expresaron a súa gratitude pola visita, marcando así o inicio dunha
cooperación internacional.
A xornada culminou na Quinta La Victoria do cantón
Tisaleo, onde Díaz e o Prefecto de Tungurahua foron recibidos polo alcalde
Milton Ramírez e as autoridades locais, gozando dunha presentación escénica
que destacou a rica historia e tradición do pobo de Tisaleo.
A visita do alcalde tamén permitiu un frutífero intercambio de
experiencias cos actores clave do sector agroindustrial de Tungurahua. Exploráronse
oportunidades de colaboración en diversas áreas, como o intercambio de
coñecementos e tecnoloxías, a promoción de produtos locais en mercados internacionais
e o desenvolvemento de proxectos conxuntos de investigación e innovación.
Esta viaxe reafirma o compromiso do Concello de Xinzo de Limia
co fomento do desenvolvemento rural e a internacionalización do municipio. Agárdase que esta
iniciativa contribúa a estreitar os lazos entre ambas rexións e xerar novas
oportunidades de colaboración no futuro, co obxectivo de impulsar o
desenvolvemento rural sostible de ambas rexións.